Акафист

Избра́ннаго Панагу́ды подви́жника/ и арома́тницу благоуха́нную,/ Каппадоки́йское прозябе́ние и предста́теля неусы́пнаго,/ да воспои́м согла́сно./ А́нгельскому бо житию́ подража́я,/ Тро́ице Святе́й благоугоди́, те́м и зове́м:/

Ра́дуйся, преподо́бне Паи́сие,// ди́вный наро́да Бо́жия уте́шителю.

А́нгел показа́лся еси́ во уде́ле Богоро́дицы избра́ннем, и на́м хода́тай тепле́йший пред Бо́гом, Паи́сие о́тче, те́мже та́ко тя́ воспева́ем:

Ра́дуйся, Каппадоки́и доброво́нное ми́ро; ра́дуйся, вы́шняго жи́тельства о́браз яви́вый.

Ра́дуйся, Аси́и Ма́лыя процвете́ние; ра́дуйся, свята́го Арсе́ния похвале́ние.

Ра́дуйся, в фарасио́тех приснопева́емый; ра́дуйся, иноку́ющих пра́вило.

Ра́дуйся, ве́лие Элла́ды и ве́ры храни́ло; ра́дуйся, Каппадоки́йскаго ро́да свети́ло.

Ра́дуйся, Византи́и боже́ственная о́трасле; ра́дуйся, добро́то Афо́на и о́рле.

Ра́дуйся, земны́й а́нгеле, ве́стниче на земли́; ра́дуйся, челове́че небе́сный, пребыва́яй на Небеси́.

Ра́дуйся, преподо́бне Паи́сие, ди́вный наро́да Бо́жия уте́шителю.

Ви́дяще, я́ко от руки́ свяще́ннаго Арсе́ния в Фара́се Каппадоки́йстей, роди́тельнице святы́х, Креще́ние прия́л еси́, и я́ко сего́ моли́тва многопло́дну тя́ о́трасль Ма́лыя Аси́и и Элла́ды яви́, тя́ прославля́ем по достоя́нию, Бо́гови пле́щуще: Аллилу́ия.

Разуме́я и познава́я страда́ния из оте́чествия произгна́нных, стра́нствуя и печа́ля о до́ма роди́тельскаго разоре́нии, в ве́ре укрепи́лся еси́ и богоразу́мия прия́л еси́ све́т от благода́ти Бо́жия, Паи́сие свя́те. Сего́ ра́ди и мы́, взира́юще на чудеса́ твоя́, восклица́ем ти́ такова́я:

Ра́дуйся, Иису́совых благослове́ний стяжа́телю; ра́дуйся, уде́ла Богома́терняго боже́ственный светода́телю.

Ра́дуйся, ве́трило многому́дрых благодея́ний; ра́дуйся, арома́тнице Вы́шняго дарова́ний.

Ра́дуйся, Бо́жия Ду́ха блаже́ннейшее сия́ние; ра́дуйся, доброде́телей несказа́нное благоуха́ние.

Ра́дуйся, Афо́нская ле́торасле прекра́сная; ра́дуйся, а́ки купе́ль Силоа́мская, врачу́яй вся́кия стра́сти.

Ра́дуйся, Пресвяты́я служи́телю преблаже́нный, Святы́я Го́ры вождю́ и кли́че побе́дный.

Ра́дуйся, поста́ и моли́твы де́лателю неусыпа́емый; ра́дуйся, засту́пниче стра́ждущих и опеча́ленных.

Ра́дуйся, преподо́бне Паи́сие, ди́вный наро́да Бо́жия уте́шителю.

Си́лою Вы́шняго укрепля́емых му́чеников чтя́ жития́ и разуме́я, ты́ душе́ю блаже́нною к непреста́нному славосло́вию Всетворца́ восходи́л еси́. Мы́ же сие́ воспомина́юще, вопие́м: Аллилу́ия.

«А́з е́смь Воскресе́ние и Живо́т. Ве́руяй в Мя́ не у́мрет во ве́ки». Си́и словеса́ от Небе́снаго Жениха́ услы́шав и испо́лнь сы́й све́та боже́ственна, неве́рия пре́лесть низве́ргл еси́. Сего́ ра́ди благода́рственно вопие́м ти́ та́ко:

Ра́дуйся, во о́трочестве безбо́жия се́ти препре́вый; ра́дуйся, я́ве Христа́ узре́вый.

Ра́дуйся, оби́тели Стомио́нския устрои́телю; ра́дуйся, Кони́тских еретико́в победи́телю.

Ра́дуйся, ми́лостыни пото́че неисчерпа́емый; ра́дуйся, не́бесным сия́нием укрепля́емый.

Ра́дуйся, Сина́йския горы́ подви́жниче; ра́дуйся, оби́тели великому́ченицы Екатери́ны моли́твенниче.

Ра́дуйся, му́дростию де́ве се́й подража́телю; ра́дуйся, святы́м Галактио́ну и Еписти́мии соседа́телю.

Ра́дуйся, са́де, прозябы́й от горы́ Моисе́евы ка́мене; ра́дуйся, моли́твы а́нгельския на земли́ воспева́ние.

Ра́дуйся, преподо́бне Паи́сие, ди́вный наро́да Бо́жия уте́шителю.

Раче́ние боже́ственное к Богома́тери, чисте́йший о́тче, поне́же име́я, Сию́ Предста́тельницу неусы́пную и Храни́тельницу стяжа́. Сего́ ра́ди и мы́, дарова́ний твои́х жела́юще приобщи́тися, о тебе́ пое́м: Аллилу́ия.

Слы́шаша и́мя твое́ земни́и концы́, Паи́сие свя́тче, ты́ бо, я́ко со́лнце блиста́яй во времена́ после́дняя и Правосла́вие утвержда́яй и́менем Го́спода Иису́са Христа́, показа́лся еси́. Мы́ же, единомы́сленне памяту́юще боже́ственная уче́ния твоя́, приноша́ем ти́ рече́ния такова́я:

Ра́дуйся, люби́мче изря́днейший Пресвяты́я; ра́дуйся, ны́ ущедря́яй Ма́тере Бо́жия кри́не.

Ра́дуйся, сомоли́твенниче Херуви́мом; ра́дуйся, единонра́вниче Серафи́мом.

Ра́дуйся, укрепле́ние Правосла́вия; ра́дуйся, у́тваре преизбра́нная.

Ра́дуйся, чернори́зцев огра́до и оте́чествия хране́ние; ра́дуйся, Ко́ницы о́трасле, Стомио́на же заступле́ние.

Ра́дуйся, я́ко лоза́ Богома́тере, благовре́менный пло́д принося́й; ра́дуйся, вертогра́де покая́ния благоуха́яй.

Ра́дуйся, бесе́дуяй Бо́жиими словесы́; ра́дуйся, умаще́ние я́звам гре́шничим.

Ра́дуйся, преподо́бне Паи́сие, ди́вный наро́да Бо́жия уте́шителю.

Богоприя́тну любо́вь я́ко стяжа́вый, же́ртву ся́ бра́тиям возложи́ и благослове́нием Пречи́стыя оделя́ше все́х. Такова́го ся́ отверже́ния ра́ди ны́не со А́нгелы Христа́ прославля́еши, мы́ же, в па́мять твою́ призыва́емии, вопие́м: Аллилу́ия.

Ви́девше тя́ ду́шу за бли́жняго полага́юща, блаже́нне Паи́сие, к тебе́ прибега́ем: ми́лостив бу́ди на́м и, Влады́це Христу́ предстоя́, Того́ умоли́, да отжене́т у́м помрача́ющую грехо́вную тьму́ от моле́бными пе́сньми хва́лящих тя́ сицевы́ми:

Ра́дуйся, Панагу́ды до́блественный ратобо́рче; ра́дуйся, Богоро́дицы песносло́вче.

Ра́дуйся, путево́дная заблу́ждшим звездо́; ра́дуйся, Афо́нская зову́щая к Бо́гу трубо́.

Ра́дуйся, утеше́ние пла́чущих; ра́дуйся, помо́щниче стра́ждущих.

Ра́дуйся, печа́льных боже́ственное укрепле́ние; ра́дуйся, не оставля́яй и́ноков попече́нием.

Ра́дуйся, у Ми́лостивыя за ны́ предста́телю; ра́дуйся, неду́жных безме́зднейший врачева́телю.

Ра́дуйся, подвиза́ющихся направля́яй; ра́дуйся, изря́дне Врата́рницу Богоро́дицу восхваля́яй.

Ра́дуйся, преподо́бне Паи́сие, ди́вный наро́да Бо́жия уте́шителю.

Пропове́дник богоно́сен еси́ и сто́лп ве́ры, да́ры Ду́ха Свята́го на́м испроша́яй, те́м и мы́ тебе́ ра́ди, ста́рче преди́вный, немо́лчно пое́м: Аллилу́ия.

Возсия́в я́ко лампа́да неугаси́мая све́том Трисо́лнечнаго Божества́, покая́ния наста́вник яви́ся, Паи́сие свя́те. Мы́ же, твои́ми предста́тельствы свы́шнее утеше́ние и благода́ти позна́ние прие́млющии, хва́лим тя́, вопию́ще:

Ра́дуйся, ковче́же себе́ отверже́ния и воздержа́ния; ра́дуйся, Уте́шителя благода́ть на на́с излива́яй.

Ра́дуйся, Со́лнца-Христа́ малове́рным провозвести́вый; ра́дуйся, ми́лостию Человеколю́бца все́х удовли́вый.

Ра́дуйся, о ми́ре моли́твою вы́ну благоуха́яй; ра́дуйся, я́ко вино́ сла́дкое, ду́ши ра́достию исполня́яй.

Ра́дуйся, Богома́тере сла́вие избра́нный; ра́дуйся, приноша́яй сле́зы Христу́ я́ко ши́пок доброуха́нный.

Ра́дуйся, Фове́ры предста́тельство и могу́чее возглаше́ние; ра́дуйся, открове́ния громогла́сное возвеще́ние.

Ра́дуйся, Та́йней Ве́чери чи́стою душе́ю приобща́выйся; ра́дуйся, помысло́в испове́данию прилежа́вый.

Ра́дуйся, преподо́бне Паи́сие, ди́вный наро́да Бо́жия уте́шителю.

Хотя́щу тебе́ Спа́су после́довати, му́ченическаго жития́ ревни́тель показа́лся еси́, душе́ю нескве́рною же и те́лом, и любо́вию боже́ственною ко Христу́. Сего́ ра́ди тя́ велича́ем, всесогла́сно пою́ще Бо́гови: Аллилу́ия.

Но́вое одоле́ние на неви́димыя и ви́димыя враги́ показа́вый, его́же моли́твою и любо́вию стяжа́, и всеору́жие смире́ния взе́м, истреби́л еси́ бесо́вския ко́вы и тща́ния, Бо́гови же благода́рственная возопи́. Те́м и мы́ прино́сим ти́ сицева́я:

Ра́дуйся, све́та боже́ственное храни́лище; ра́дуйся, благоутро́бия Христо́ва вмести́лище.

Ра́дуйся, псалти́ри Дави́довы пе́ние; ра́дуйся, свята́го Арсе́ния умоле́ние.

Ра́дуйся, гре́шников исправля́яй и ободря́яй; ра́дуйся, ми́лование у Богоро́дицы испроша́яй.

Ра́дуйся, главо́ подви́жников венцено́сная; ра́дуйся, се́не стра́ждущим росоно́сная.

Ра́дуйся, водо́ живи́тельная претыка́ющимся; ра́дуйся, мо́сте, в жи́знь изводя́й утопа́ющих.

Ра́дуйся, сто́лпе гре́шником па́дшим и укрепле́ние; ра́дуйся, разсла́бленным ти́хий о́дре и упокое́ние.

Ра́дуйся, преподо́бне Паи́сие, ди́вный наро́да Бо́жия уте́шителю.

Стра́нен бы́в в ми́ре, Паи́сие, Го́спода возлюби́в и стра́сти твоя́ укроти́в Бо́жиею благода́тию, ны́не же я́ко зарни́ца облистава́еши о тебе́ вопию́щих немо́лчное: Аллилу́ия.

Вся́к, к тебе́ притека́яй, николи́же, о́тче Паи́сие, неуте́шен оты́де. Но прося́й благода́ти дарова́ние приима́ше. Сего́ ра́ди и мы́ воспева́ем ти́ сицева́я:

Ра́дуйся, лучено́сная омраче́нным звездо́; ра́дуйся, ка́ющихся наста́вниче и главо́.

Ра́дуйся, афо́нския бра́тии тяготы́ взе́мляй; ра́дуйся, Всесвяты́я са́да цве́те преукраше́нный.

Ра́дуйся, о благосты́ни Христо́ве сладковеща́ние; ра́дуйся, моли́твы небе́сныя мироуха́ние.

Ра́дуйся, ми́рови Месси́ю провозвеща́яй; ра́дуйся, пе́снь арха́нгелову ко Пресвяте́й воспева́яй.

Ра́дуйся, наде́ждою, ми́лостию и любо́вию пламене́яй; ра́дуйся, во вра́жией бра́ни боже́ственное омове́ние.

Ра́дуйся, прия́вый дарова́ние проро́ческое; ра́дуйся, благоутро́бием Отцу́ Небе́сному подо́бниче.

Ра́дуйся, преподо́бне Паи́сие, ди́вный наро́да Бо́жия уте́шителю.

Вся́кому естеству́ пропове́дал еси́ сло́во, апо́столом уподобля́яся, раче́нием же и любо́вию к бли́жним просия́л еси́ я́ко со́лнце на земли́, прославля́я Святу́ю Тро́ицу: Аллилу́ия.

Сле́з пото́ки от души́ мироточа́, се́рдцем о челове́цех, стра́ждущих душе́ю и те́лом, боля́ше. Сего́ ра́ди ны́не и мы́ от ду́ш на́ших песнопе́ния ти́ возсыла́ем, в смире́нии вопию́ще приле́жно:

Ра́дуйся, Ева́нгелия служи́телю неутоми́мый; ра́дуйся, све́щниче Трисо́лнечнаго Божества́ неугаси́мый.

Ра́дуйся, я́ко по́стничества риста́лище соверши́вый; ра́дуйся, я́ко смире́нием кра́йним ины́х предвари́вый.

Ра́дуйся, во Афо́не ве́ры сия́ние; ра́дуйся, Всесвяты́я сла́дкое воспева́ние.

Ра́дуйся, учи́телю сла́вный дея́ния же и зре́ния; ра́дуйся, я́ко велему́дре пости́же боже́ственное виде́ние.

Ра́дуйся, Пречи́стыя вертогра́да неусыпа́емый де́лателю; ра́дуйся, святы́м Лукиллиа́ну, Пантелеи́мону и Евфи́мии собесе́дателю.

Ра́дуйся, я́ко гла́с Богоотрокови́цы слу́хом услы́шал еси́; ра́дуйся, я́ко Ту́ я́ве, а́ки на Иерусали́мстей ико́не, узре́л еси́.

Ра́дуйся, преподо́бне Паи́сие, ди́вный наро́да Бо́жия уте́шителю.

Вели́чествие со Элла́дою Каппадоки́и и те́плый засту́пник еси́, Паи́сие свя́те. Доброде́телей бо ле́ствицу богоуго́дно соверши́, к Тро́ице Святе́й непреста́нно поя́: Аллилу́ия.

Стена́ еси́ ве́рным, о́тче Паи́сие, а́нгельское бо житие́ возлюби́в, по́двиги свои́ми Святе́й Тро́ице неуста́ннаго предстоя́ния ско́ро дости́же. Сего́ ра́ди пе́ния благода́рственная возсыла́юще из глубины́ серде́ц и ду́ш на́ших, смире́нно взыва́ем:

Ра́дуйся, от Афо́на богоявле́нно ми́ру сия́яй; ра́дуйся, краснопе́снивый гла́се, Сло́во провозвеща́яй.

Ра́дуйся, многоча́дне, ми́луяй челове́ческая боле́ния; ра́дуйся, ослепле́нным стезе́й исправле́ние.

Ра́дуйся, Неневе́стней Неве́сте ра́дование принося́й; ра́дуйся, к Ца́рству Небе́сному пу́ть удовля́яй.

Ра́дуйся, кади́лу Ду́ха Бо́жия соиме́нне; ра́дуйся, я́ко и зра́к тво́й на́м подае́т утеше́ние.

Ра́дуйся, я́ко в ми́ра конце́х веща́нием предвари́вый; ра́дуйся, зми́я главу́ моли́твою сокру́шивый.

Ра́дуйся, моле́ния и́менем Иису́совым и среди́ ми́ра де́лателю неуста́нный; ра́дуйся, к Бо́жией Ма́тери стяжа́вый любо́вь несказа́нну.

Ра́дуйся, преподо́бне Паи́сие, ди́вный наро́да Бо́жия уте́шителю.

Пе́ние Зижди́телю и Присноде́ве к боре́нием я́же в нощи́ и во дни́ соплета́ше смире́нно, те́м ся́ Бо́жия Ду́ха сосу́д показу́я. Мы́ же, Тро́ице Святе́й припа́дающе, тебе́ ра́ди пое́м и вопие́м: Аллилу́ия.

Све́т и мироуха́ние благоче́стия, и любве́, и самоотверже́ния неисче́тнаго, и исцеле́ний то́чит свята́я па́мять твоя́, преподо́бне. Сего́ ра́ди потща́хомся вси́ моле́бными гла́сы тебе́ возопи́ти:

Ра́дуйся, я́ко вся́кому указу́яй пу́ть на небеса́; ра́дуйся, я́ко ра́дости все́х исполня́ют медото́чная твоя́ словеса́.

Ра́дуйся, изоби́льная от Афо́на реко́ искипа́ющая; ра́дуйся, звездо́ от Святы́я Го́ры, ве́рным пу́ть озаря́ющая.

Ра́дуйся, при́сное за ны́ у Богоотрокови́цы хода́тайство; ра́дуйся, а́нгельскому житию́ прилежа́щим предста́тельство.

Ра́дуйся, доброде́телей плодоно́снейшая лозо́; ра́дуйся, о ми́ре к Престо́лу достига́ющая слезо́.

Ра́дуйся, но́вый апо́столе, к ве́ре Христо́ве вся́ призыва́яй; ра́дуйся, Правосла́вия гла́се, мно́зи возсозида́яй.

Ра́дуйся, дре́во всепло́дное, Ма́терию Небе́сною напоя́емое; ра́дуйся, элли́нов зна́мя, в подсо́лнечней распростира́емое.

Ра́дуйся, преподо́бне Паи́сие, ди́вный наро́да Бо́жия уте́шителю.

Благода́ти Бо́жия исто́к тя́ позна́хом, о́тче, по успе́нии твое́м, в не́мже ли́цы а́нгельстии весе́лия исполня́хуся. Те́м и мы́, хода́тая о спасе́нии на́шем улучи́ти сподо́бльшиися, ра́дуемся, взыва́юще: Аллилу́ия.

Пою́ще бе́здну чуде́с твои́х и терпели́вныя твоя́ по́двиги, свя́те, от серде́ц ти́ сплета́ем а́нгельская песнопе́ния, па́мять твою́ почита́ем благогове́йно и вопие́м такова́я:

Ра́дуйся, наде́жды оте́чествию забве́нному ве́стниче; ра́дуйся, о свобожде́нии Святы́я Софи́и и гра́да Вели́каго пропове́дниче.

Ра́дуйся, Царьгра́д во упова́ние но́вое ди́вно предуказа́вый; ра́дуйся, хода́таю уде́ла сла́внаго от стра́н свои́х произгна́нным.

Ра́дуйся, не то́кмо единоплеме́нных путеводя́й, но и от ины́х язы́к приходя́щих; ра́дуйся, я́ко сыно́в Це́ркве зело́ любя́, благоуве́тливо приима́ше.

Ра́дуйся, плене́нных о́тчин прореки́й обновле́ние; ра́дуйся, ми́ру блиста́ние, ве́ры немо́лчное возглаше́ние.

Ра́дуйся, я́ко зна́мения време́н разуме́вый; ра́дуйся, Открове́ния Иоа́ннова таи́нниче богодухнове́нный.

Ра́дуйся, я́ко апо́стол, явле́й обетова́ния; ра́дуйся, избавле́ния Аси́и Ма́лыя упова́ние.

Ра́дуйся, преподо́бне Паи́сие, ди́вный наро́да Бо́жия уте́шителю.

О преподо́бне о́тче Паи́сие, новоцве́те благоуха́нный, изра́стший во времена́ после́дняя, умоли́ Христа́ Бо́га спасти́ся душа́м о тебе́ воспева́ющих: Аллилу́ия.

А́нгел показа́лся еси́ во уде́ле Богоро́дицы избра́ннем, и на́м хода́тай тепле́йший пред Бо́гом, Паи́сие о́тче, те́мже та́ко тя́ воспева́ем:

Ра́дуйся, Каппадоки́и доброво́нное ми́ро; ра́дуйся, вы́шняго жи́тельства о́браз яви́вый.

Ра́дуйся, Аси́и Ма́лыя процвете́ние; ра́дуйся, свята́го Арсе́ния похвале́ние.

Ра́дуйся, в фарасио́тех приснопева́емый; ра́дуйся, иноку́ющих пра́вило.

Ра́дуйся, ве́лие Элла́ды и ве́ры храни́ло; ра́дуйся, Каппадоки́йскаго ро́да свети́ло.

Ра́дуйся, Византи́и боже́ственная о́трасле; ра́дуйся, добро́то Афо́на и о́рле.

Ра́дуйся, земны́й а́нгеле, ве́стниче на земли́; ра́дуйся, челове́че небе́сный, пребыва́яй на Небеси́.

Ра́дуйся, преподо́бне Паи́сие, ди́вный наро́да Бо́жия уте́шителю.

Избра́ннаго Панагу́ды подви́жника/ и арома́тницу благоуха́нную,/ Каппадоки́йское прозябе́ние и предста́теля неусы́пнаго,/ да воспои́м согла́сно./ А́нгельскому бо житию́ подража́я,/ Тро́ице Святе́й благоугоди́, те́м и зове́м:/

Ра́дуйся, преподо́бне Паи́сие,// ди́вный наро́да Бо́жия уте́шителю.