Акафист
Святой праведной Анне, матери Пресвятой Богородицы
Благословен Бог наш, всегда, ныне и присно, и во веки веков.
Ами́нь.
Слава Тебе, Боже наш, слава Тебе.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Бог Госпо́дь, и яви́ся нам, / благослове́н Гряды́й во И́мя Госпо́дне.
Бог Госпо́дь, и яви́ся нам, / благослове́н Гряды́й во И́мя Госпо́дне.
Исповедайтеся Господеви, яко благ, яко в век милость Его.
Бог Госпо́дь, и яви́ся нам, / благослове́н Гряды́й во И́мя Госпо́дне.
Обышедше обыдоша мя и именем Господним противляхся им. Не умру, но жив буду и повем дела Господня.
Бог Госпо́дь, и яви ́ся нам, / благослове́н Гряды́й во И́мя Госпо́дне.
Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.
Бог Госпо́дь, и яви́ся нам, / благослове́н Гряды́й во И́мя Госпо́дне.
Жизнь ро́ждшую во чре́ве носи́ла еси, Чи́стую Богома́терь, Богому́драя А́нно, те́мже к прия́тию Небе́сному, иде́же веселя́щихся жили́ще, в сла́ве ра́дующися, ны́не преста́вилася еси, чту́щим тя любо́вию прегреше́ний прося́щи очище́ние, присноблаже́нная.
Сла́ва Отцу́ и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.
Прароди́телей Христо́вых па́мять пра́зднуем, тех ве́рно прося́ще по́мощи изба́витися всем от вся́кия ско́рби, зову́щим: Бог наш с на́ми, сих прославле́й, я́коже благоволи́.
Иису́се Сладча́йший, спаси́ нас.
Иису́се Сладча́йший, спаси́ нас.
Пресвята́я Богоро́дице, спаси́ нас.
Пресвята́я Богоро́дице, спаси́ нас.
Свята́я пра́ведная А́нно, моли́ Бога о нас
Свята́я пра́ведная А́нно, моли́ Бога о нас
[Дважды]
Сла́ва Отцу́ и Сы́ну и Свято́му Ду́ху.
И ны́не и при́сно и во ве́ки веко́в. Ами́нь.
Моли́ Бога о нас, свята́я пра́ведная А́нно, / я́ко мы усе́рдно к тебе́ прибега́ем, / ско́рой помо́щнице и моли́твеннице о душа́х на́ших.
Избра́нней прароди́тельнице Христа́ Бога на́шего, Ду́ха Свята́го благода́ти испо́лненней, пе́сни хвале́бныя принесе́м, ве́рнии, я́ко моли́твами свои́ми избавля́ет нас от бед и ско́рбей, благода́ть излива́ющи всем вопию́щим ей такова́я:
Ра́дуйся, А́нно Богому́драя.
А́нгел с Небесе́ предста́, провеща́я тебе́, А́нно, о зача́тии Дще́ри Преблагослове́нныя, от Нея́же роди́тися и́мать Спас ми́ру – Христо́с. Мы же, дивя́ся неизрече́нному о тебе́ Бо́жию Про́мыслу, вопие́м ти такова́я:
Ра́дуйся, пред Бо́гом неуста́нная на́ша моли́твеннице; ра́дуйся, препросла́вленная прама́терь Госпо́дня.
Ра́дуйся, Зако́на, Бо́гом да́ннаго, почита́ние; ра́дуйся, сла́вы гряду́щия возглаше́ние.
Ра́дуйся, Бога Всемогу́щаго умилостивле́ние; ра́дуйся, глубино́ вся́кия доброде́тели.
Ра́дуйся, роди́вши Дщерь, в ста́рости процве́тшая; ра́дуйся, Про́мыслу Бо́жию всю себе́ преда́вшая.
Ра́дуйся, заре́ сия́ния гряду́щаго; ра́дуйся, сосу́де благода́ти Бо́жия.
Ра́дуйся, безпло́дие умертви́вшая; ра́дуйся, чадоро́дие яви́вшая.
Ра́дуйся, А́нно Богому́драя.
Ви́дев себе́ А́нна в безпло́дии пребыва́ющую, воззва́ ко Го́споду вся́ческих, да сподо́бит ю ма́терь ча́ду бы́ти. И се яви́ся ей А́нгел Госпо́день, глаго́ля: «Услы́шана есть моли́тва твоя́ и воздыха́ния твоя́ проидо́ша о́блаки, сле́зы же твоя́ пред Бога внидо́ша; се зачне́ши и роди́ши Дщерь Преблагослове́нную, о Не́йже возблагословя́тся вся коле́на земна́я, и То́ю да́стся спасе́ние всему́ ми́ру, нарече́тся же и́мя Ей: Мари́я». И зача́в, родила́ еси Ту, от Нея́же Рожде́нному воспева́ем: Аллилу́иа.
Ра́зумом свы́ше осене́нная, прама́ти Госпо́дня, изволе́нием Вы́шняго в ста́рости зача́ла еси, возра́довавшеся неизрече́нно; роди́в же ми́ру исто́чник ра́дости, мрак уны́ния отжени́ от нас, все́ми воспева́емая си́це:
Ра́дуйся, воздыха́ния на́ша не отверга́ющая; ра́дуйся, весе́лия се́рдца на́ша исполня́ющая.
Ра́дуйся, поноше́ние безча́дства попра́вшая; ра́дуйся, ко́рень де́вства ми́ру яви́вшая.
Ра́дуйся, в ле́тех прекло́нных Дщерь Пресвяту́ю роди́вшая; ра́дуйся, виде́нием Богоотрокови́цы услажде́нная.
Ра́дуйся, веле́ний Бо́жиих испо́лненная; ра́дуйся, кро́тостию и смире́нием укра́шенная.
Ра́дуйся, благода́ть у Бога обре́тшая; ра́дуйся, лесть бесо́вскую отгна́вшая.
Ра́дуйся, бе́дствующим ско́рая помо́щнице; ра́дуйся, защи́тнице на́ша и́стинная.
Ра́дуйся, А́нно Богому́драя.
Бо́гу славосло́вие принося́, свята́я А́нно, с Иоаки́мом, супру́гом твои́м, триле́тнюю непоро́чную Ю́ницу во святи́лище Бо́жие привела́ еси, я́коже обеща́лася Го́сподеви, воспева́я песнь: Аллилу́иа.
Стопы́ твоя́ по за́поведем Бо́жиим направля́я, яви́лася еси о́бразом доброде́телей, всеблаже́нная А́нно. Мы же, ви́дяще пра́ведное житие́ твое́, воспева́ем си́це:
Ра́дуйся, ве́рных спаси́тельное прибе́жище; ра́дуйся, христиа́н непосты́дное упова́ние.
Ра́дуйся, нача́ток на́шего спасе́ния; ра́дуйся, кла́дезю вся́кия доброде́тели.
Ра́дуйся, оби́льная лозо́ плодо́в пра́ведности; ра́дуйся, достопочте́нная ски́ние даро́в Небе́сных.
Ра́дуйся, обетова́ние Бо́жие обре́тшая; ра́дуйся, Дщерь Преблагослове́нную ро́ждшая.
Ра́дуйся, о́бразе ве́ры зако́нныя; ра́дуйся, розго́ виногра́да живо́тнаго.
Ра́дуйся, реко́ даро́в оби́льных; ра́дуйся, кимва́ле доброгла́сный сла́вы Бо́жия.
Ра́дуйся, А́нно Богому́драя.
Житие́ свое́ в богопочте́нии проводя́щи, всели́лася еси, я́ко ма́терь Преблагослове́нныя Богоро́дицы, в селе́ния го́рняя, и вку́пе с Пречи́стою Дще́рию твое́ю предстои́ши Небе́сному Престо́лу, взыва́я к Рожде́нному от Нея́: Аллилу́иа.
От ми́ра до́льняго ко сла́ве Небе́сней возше́дшая и та́мо ди́вно со Дще́рию твое́ю Го́сподеви предста́вшая, А́нно всеблаже́нная, ми́ром и любо́вию оби́льно исполня́еши нас, на земли́ тебе́ пою́щих такова́я:
Ра́дуйся, Бо́жиим све́том озаре́нная; ра́дуйся, вмести́лище ра́дости непреста́нныя.
Ра́дуйся, ве́лия благоче́стия та́йны досто́йная служи́тельнице; ра́дуйся, Бо́жия к челове́ком снисхожде́ния всеизря́дная посре́днице.
Ра́дуйся, све́та животворя́щаго испо́лненная; ра́дуйся, дерзнове́ние ве́лие ко Го́споду иму́щая.
Ра́дуйся, Ма́терь Бо́жию роди́вшая; ра́дуйся, мно́гих на путь спасе́ния наставля́ющая.
Ра́дуйся, неду́ги многоразли́чныя исцеля́ющая; ра́дуйся, си́лу вра́жию упраздня́ющая.
Ра́дуйся, та́ин Бо́жиих прия́телище; ра́дуйся, Це́ркве, на Небеси́ торжеству́ющия, украше́ние.
Ра́дуйся, А́нно Богому́драя.
Искупи́теля на́шего сия́нием Боже́ственным озаре́нная, свята́я пра́ведная А́нно, мрак неве́дения отжени́ от нас, воспева́ющих Бо́гу: Аллилу́иа.
Ви́девше тя, пра́ведная А́нно, весе́лия испо́лненную, я́ко рождество́м Дще́ри твоея́ безча́дие твое́ разреши́ся; сего́ ра́ди мо́лим тя: испо́лни ра́дости духо́вныя всех тебе́ воспева́ющих:
Ра́дуйся, исто́чник благода́ти ро́ждшая; ра́дуйся, жи́зни ве́чныя дости́гшая.
Ра́дуйся, жен благогове́йных ве́нче; ра́дуйся, благода́ти Бо́жия сокро́вище.
Ра́дуйся, столпе́ и́стиннаго целому́дрия; ра́дуйся, Ду́ха Боже́ственнаго жили́ще
Ра́дуйся, исто́чниче чуде́с Бо́жиих; ра́дуйся, душ святы́х украше́ние.
Ра́дуйся, воздыха́ния на́ша не отверга́ющая; ра́дуйся, мно́жество страсте́й исцеля́ющая.
Ра́дуйся, си́лу враго́в на́ших ни во что́же обраща́ющая; ра́дуйся, ве́рных си́лою Бо́жиею укрепля́ющая.
Ра́дуйся, А́нно Богому́драя.
Поноше́ние безча́дства отри́нувше, зача́ла еси в ста́рости твое́й, А́нно преблаже́нная; сего́ ра́ди прия́ла еси благода́ть от Бога жена́м безпло́дным, с ве́рою к тебе́ притека́ющим, ча́да дар ова́ти, вопию́щим Бо́гу: Аллилу́иа.
Возсия́ла еси, я́ко светоза́рная звезда́, богоуго́дным житие́м твои́м, пра́ведная А́нно, отгоня́ющи тьму греха́ и неве́рия. Те́мже восхваля́юще тя, усе́рдно вопие́м:
Ра́дуйся, я́ко ма́терь еси Ма́тери Спа́са на́шего; ра́дуйся, Небе́снаго Престо́ла предстоя́тельнице.
Ра́дуйся, дерзнове́ние ве́лие ко Го́споду иму́щая; ра́дуйся, при́сно о нас пред Ним моля́щаяся.
Ра́дуйся, со Дще́рию твое́ю, всех Цари́цею, ве́чно ца́рствующая; ра́дуйся, в Сио́не го́рнем све́тло торжеству́ющая.
Ра́дуйся, землю́ де́вства произве́дшая; ра́дуйся, плоды́ сла́вы ве́чныя собра́вшая.
Ра́дуйся, страсте́м грехо́вным путь прегражда́ющая; ра́дуйся, мрак душ на́ших разгоня́ющая.
Ра́дуйся, бе́дствующим помо́щнице; ра́дуйся, Сло́ва Бо́жия прама́терь.
Ра́дуйся, А́нно Богому́драя.
Всех нас, к заступле́нию твоему́ притека́ющих, изба́ви от вся́ких бед и ско́рбей, А́нно присноблаже́нная, и напра́ви стопы́ на́ша к жи́зни ве́чней, да во Ца́рствии Небе́снем при́сно вопие́м: Аллилу́иа.
Вся за́поведи Бо́жия в житии́ твое́м соблюда́ла еси, свят а́я пра́ведная А́нно; те́мже помози́ и нам се́рдцем чи́стым сла́вити Го́спода, зову́ще тебе́ такова́я:
Ра́дуйся, звездо́, сия́ющая на Не́бе церко́внем; ра́дуйся, свети́льниче пресве́тлый, путь спасе́ния нам указу́ющий.
Ра́дуйся, сла́вы Бо́жия соприча́стнице; ра́дуйся, Ца́рствия Небе́снаго сонасле́днице.
Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.
Ра́дуйся, жен безпло́дных ча́дами веселя́щая; ра́дуйся, скорбя́щих утеша́ющая.
Ра́дуйся, прама́терь Бо́жия сла́вная; ра́дуйся, хода́таице о нас усе́рдная.
Ра́дуйся, душ ве́рных блаже́нная ра́досте; ра́дуйся, между́ жена́ми благословля́емая.
Ра́дуйся, А́нно Богому́драя.
Обрела́ еси плод чу́дный в ста́рости Твое́й, пра́ведная А́нно, Богоотрокови́цу Мари́ю породи́вши; сего́ ра́ди вси ро́ди христиа́нстии Бо́гу, в тебе́ просла́вльшемуся, воспева́ют гла́сом ве́лиим: Аллилу́иа.
Стра́нствие земно́е соверши́вши, свята́я пра́ведная А́нно, сном сме́ртным на рука́х Преблагослове́нныя Дще́ри твоея́ почи́ла еси и в Небе́сныя оби́тели преста́вилася еси. Те́мже свято́е успе́ние твое́ сла́вяще и к цельбоно́сным моще́м твои́м вы́ну притека́юще, вопие́м:
Ра́дуйся, безпло́дия разреше́ние; ра́дуйся, чад долгожда́нных рожде́ние.
Ра́дуйся, матери́нства благослове́ние; ра́дуйся, сокро́вище даро́в Бо́жиих неиждива́емое.
Ра́дуйся, у́зы греха́ растерза́ющая; ра́дуйся, ско́рбныя се́рдца дарова́нием чад ободря́ющая.
Ра́дуйся, дерзнове́ние ве́лие ко Го́споду стяжа́вшая; ра́дуйся, ми́лость Христо́ву привлека́ющая.
Ра́дуйся, неве́рных уста́ загражда́ющая; ра́дуйся, враги́ низлага́ющая.
Ра́дуйся, реко́ Бо́жия милосе́рдия; ра́дуйся, исцеле́ний исто́чниче неоскудева́емый.
Ра́дуйся, А́нно Богому́драя.
Вси А́нгели Бо́жии и ли́цы святы́х на Небеси́ велича́ют тя, преблаже́нная А́нно, вку́пе со святы́м супру́гом твои́м пра́ведным Иоаки́мом, ро́ди же челове́честии на земли́ моли́твенно на по́мощь вас призыва́ют, вопию́ще о предста́тельстве ва́шем Бо́гу: Аллилу́иа.
Вити́и многовеща́нныя умолко́ша, зря Преблагослове́нную Дщерь твою́, свята́я пра́ведная А́нно, Ро́ждшую во пло́ти Всеблага́го Бога, спасе́ние ве́чное да́рующаго. Мы же вопие́м ти си́це:
Ра́дуйся, ра́дости исто́чниче; ра́дуйся, целому́дрия свети́льниче.
Ра́дуйся, вся́кую лесть обличи́вшая; ра́дуйся, мрак но́щи и ка́мение преткнове́ния отмета́ющая.
Ра́дуйся, неду́ги многоболе́зненныя исцеля́ющая; ра́дуйся, пото́ки ми́лости излива́ющая.
Ра́дуйся, согреша́ющих вразумля́ющая; ра́дуйся, малове́рныя умудря́ющая.
Ра́дуйся, гре́шники к покая́нию призыва́ющая; ра́дуйся, от ро́ва поги́бели исхища́ющая.
Ра́дуйся, ра́дости на́шея основа́ние; ра́дуйся, слез на́ших избавле́ние.
Ра́дуйся, А́нно Богому́драя.
Изба́ви нас от вся́кия ну́жды, боле́зни и ско́рби, свята́я пра́ведная А́нно, и моли́твы на́ша Спа́су всех Бо́гу принеси́, к заступле́нию твоему́ усе́рдно притека́ющих и в благогове́нии пою́щих: Аллилу́иа.
Стено́ю моли́тв твои́х заступи́ нас, прама́ти Бо́жия А́нно, сохраня́ющи и огражда́ющи нас от всех прило́гов вражи́х, мы бо вопие́м тебе́:
Ра́дуйся, благоче́стия столпе́; ра́дуйся, беззако́ния паде́ние.
Ра́дуйся, тружда́ющихся по́мощь; ра́дуйся, просла́вленная прама́терь Бо́жия.
Ра́дуйся, сме́ртныя неду́ги исцеля́ющая; ра́дуйся, се́рдца сокруше́нныя утеша́ющая.
Ра́дуйся, всем стра́ждущим избавле́ние да́рующая; ра́дуйся, прося́щим по́мощь подаю́щая.
Ра́дуйся, еле́й ми́лости Бо́жия оби́льно нам источа́ющая; ра́дуйся, све́том благода́ти, я́ко мо́лния, блиста́ющая.
Ра́дуйся, сла́ву Бо́жию зря́щая; ра́дуйся, со А́нгелы веселя́щаяся.
Ра́дуйся, А́нно Богому́драя.
Пе́ние на́ше хвале́бное ми́лостивно приими́, свята́я пра́ведная А́нно, и щедро́т твои́х моли́твенных не лиши́ нас, к тебе́ бо в ско́рбех серде́ц на́ших притека́ем, по́мощи у тебе́ прося́ще и вопию́ще всех благ Пода́телю Бо́гу: Аллилу́иа.
Светоза́рным све́том ми́лостей сия́ет нам о́браз твой честны́й, свята́я пра́ведная А́нно, подаю́щи исцеле́ния и благода́тную по́мощь всем к нему́ притека́ющим и вопию́щим тебе́ си́це:
Ра́дуйся, утеше́ние стра́ждущих; ра́дуйся, укрепле́ние изнемога́ющих.
Ра́дуйся, безпло́дныя утро́бы исправле́ние; ра́дуйся, сокруше́ннаго се́рдца исцеле́ние.
Ра́дуйся, у́зы безпло́дия сокруша́ющая; ра́дуйся, страх страда́ния прекраща́ющая.
Ра́дуйся, ча́да безпло́дным да́рующая; ра́дуйся, исцеле́ние боля́щим подаю́щая.
Ра́дуйся, ма́терей благочести́вых похвало́; ра́дуйся, жен безпло́дных помо́щнице.
Ра́дуйся, благоче́стных люде́й ликова́ние; ра́дуйся, душ и теле́с на́ших врачева́ние.
Ра́дуйся, А́нно Богому́драя.
Благ ода́ть Бо́жию нам пода́ти, согреше́ний проще́ние и житию́ на́шему вся благопотре́бная у Го́спода испроси́, свята́я пра́ведная А́нно, и не преста́й моли́тися о нас пред лице́м Христа́ Вседержи́теля, да, получи́вше от Него́ тобо́ю ми́лость, вопие́м Ему́: Аллилу́иа.
Пою́ще многомо́щное предста́тельство твое́, свята́я пра́ведная А́нно, прославля́ем возвели́чившаго тя Го́спода, дарова́вшаго нам толи́кую те́плую моли́твенницу за род наш, и в похвалу́ си́це тебе́ вопие́м:
Радуйся, христианом крепкое прибежище; радуйся, монашествующих тихое радование.
Ра́дуйся, оби́телей и́ноческих покро́ве и укрепле́ние; ра́дуйся, всем ве́рным поможе́ние.
Ра́дуйся, скорбя́щих утеше́ние; ра́ду йся, всех чту́щих тя огнезра́чное заступле́ние.
Ра́дуйся, от вся́кия ну́жды нас избавля́ющая; ра́дуйся, исцеле́ния всем подаю́щая.
Ра́дуйся, стра́сти на́ша потребля́ющая; ра́дуйся, ми́лость Бо́жию нам явля́ющая.
Ра́дуйся, ра́дости нас исполня́ющая; ра́дуйся, не́мощи на́ша врачу́ющая.
Ра́дуйся, А́нно Богому́драя.
О свята́я пра́ведная А́нно, приими́ от нас, недосто́йных, хвале́бное пе́ние сие́, от неду́гов душе́вных и теле́сных нас исцели́, от всех враг ви́димых и неви́димых заступи́ и ве́чнаго муче́ния изба́витися нам Го́спода умоли́, да с тобо́ю воспева́ем во Ца́рствии Его́: Аллилу́иа.
Се́й конда́к глаго́ли три́жды, посе́м 1-й и́кос и 1-й конда́к.
А́нгел с Небесе́ предста́, провеща́я тебе́, А́нно, о зача́тии Дще́ри Преблагослове́нныя, от Нея́же роди́тися и́мать Спас ми́ру – Христо́с. Мы же, дивя́ся неизрече́нному о тебе́ Бо́жию Про́мыслу, вопие́м ти такова́я:
Ра́дуйся, пред Бо́гом неуста́нная на́ша моли́твеннице; ра́дуйся, препросла́вленная прама́терь Госпо́дня.
Ра́дуйся, Зако́на, Бо́гом да́ннаго, почита́ние; ра́дуйся, сла́вы гряду́щия возглаше́ние.
Ра́дуйся, Бога Всемогу́щаго умилостивле́ние; ра́дуйся, глубино́ вся́кия доброде́тели.
Ра́дуйся, роди́вши Дщерь, в ста́рости процве́тшая; ра́дуйся, Про́мыслу Бо́жию всю себе́ преда́вшая.
Ра́дуйся, заре́ сия́ния гряду́щаго; ра́дуйся, сосу́де благода́ти Бо́жия.
Ра́дуйся, безпло́дие умертви́вшая; ра́дуйся, чадоро́дие яви́вшая.
Ра́дуйся, А́нно Богому́драя.
Избра́нней прароди́тельнице Христа́ Бога на́шего, Ду́ха Свята́го благода́ти испо́лненней, пе́сни хвале́бныя принесе́м, ве́рнии, я́ко моли́твами свои́ми избавля́ет нас от бед и ско́рбей, благода́ть излива́ющи всем вопию́щим ей такова́я:
Ра́дуйся, А́нно Богому́драя.
Глас 4
Во́нмем. Премудрость во́нмем. Проки́мен, глас 4. Ди́вен Бог во святы́х Свои́х Бог Изра́илев.
Ди́вен Бог во святы́х Свои́х Бог Изра́илев.
В це́рквах благослови́те Бо́га, Го́спода от исто́чник Изра́илевых.
Ди́вен Бог во святы́х Свои́х Бог Изра́илев.
Ди́вен Бог во святы́х Свои́х
Бог Изра́илев.
Господу помолимся.
Господи, помилуй.
Яко свят, еси, Боже наш, и во святых почиваеши, и Тебе славу воссылаем, Отцу и Сыну и Святому Духу, ныне и присно и во веки веков.
Ами́нь.
Всякое дыхание да хвалит Господа.
Всякое дыхание да хвалит Господа.
Хвалите Бога во святых Его, хвалите Его во утвержении силы Его.
Всякое дыхание да хвалит Господа.
Всякое дыхание
да хвалит Господа.
И о сподобитися нам слышанию Святаго Евангелия Господа Бога молим.
Господи, помилуй (3 раза)
Премудрость, прости, услышим святаго Евангелия. Мир всем.
И духови твоему
От [имярек] святаго Евангелия чтение
Слава Тебе, Господи, слава Тебе.
Чтение Евангелия
Слава Тебе, Господи, слава Тебе.
Иису́се Сладча́йший, спаси́ нас.
Иису́се Сладча́йший, спаси́ нас.
Пресвята́я Богоро́дице, спаси́ нас.
Пресвята́я Богоро́дице, спаси́ нас.
Свята́я пра́ведная А́нно, моли́ Бога о нас
Свята́я пра́ведная А́нно, моли́ Бога о нас
[Дважды]
Сла́ва Отцу́ и Сы́ну и Свято́му Ду́ху.
И ны́не и при́сно и во ве́ки веко́в. Ами́нь.
Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице: / Ты нам помози́, на Тебе́ наде́емся, / и Тобо́ю хва́лимся: // Твои́ бо есмы́ раби́, да не постыди́мся.
Помилуй нас, Боже по велицей милости Твоей, молим Ти ся, услыши и помилуй.
Господи, помилуй (3 раза)
Еще молимся о Господине и Отце нашем Блаженнейшем Савве Митрополите Варшавским и всея Польши, и о Господине нашем Преосвященнейшем Афанасии Епи́скопе Лодзинским и Познаньским, и всей во Христе братии нашей.
Господи, помилуй (3 раза)
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Господи, помилуй (3 раза)
Еще молимся Господу Богу нашему, о еже услышати глас моления нас грешных, и помиловати... (перечисляются имена)
Господи, помилуй (много раз по 3 раза)
... и всих прихожан святаго храма сего, и всих здесь предстоящих и молящихся, воспевающих в святым храме сем, даровати же им здравие с долгоденствием, рцем вси: Господи, услыши и милостивно помилуй.
Господи, помилуй (3 раза)
Услы́ши ны, Бо́же, Спа́сителю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Ами́нь
Ко святой праведной Анне с умилением сердец помолимся.
Свята́я пра́ведная А́нна, моли́ Бога о нас
***
О свята́я пра́ведная А́нно, ро́ждшая пре́жде век предопределе́нную роди́тися Ма́терь Бо́жию, прама́ти Всеми́лостиваго и Всеще́драго Спаси́теля на́шего, гото́вое заступле́ние и предста́тельство с ве́рою к тебе́ притека́ющих! Ты душею на Небеси́ у Престо́ла Бо́жия предстои́ши, на земли́ же, да́нною тебе́ благода́тию, разли́чная соверша́еши исцеле́ния.
При́зри у́бо ми́лостиво, пра́ведная А́нно, на предстоя́щия лю́ди, моля́щияся пред свято́ю ико́ною твое́ю и прося́щия твоея́ по́мощи; простри́ ко Го́споду святы́я моли́твы твоя́ о нас, недосто́йных, и испроси́ нам оставле́ние согреше́ний на́ших; пода́ждь неду́жным исцеле́ние, скорбя́щим утеше́ние, бе́дствующим ско́рую по́мощь; даждь плод чре́ва призыва́ющим тя, разреша́я их безпло́дие; при́зри на моли́твы безча́дных жен и благоча́дны их сотвори́.
Приими́ моле́ние нас, гре́шных, свята́я А́нно, и преложи́ печа́ли на́ша в ра́дость, я́ко да твои́ми моли́твами получи́вше благода́ть и ми́лость, просла́вим всех благи́х Исто́чника и Даропода́теля Бога, в Тро́ице Святе́й сла́вимаго, Отца́ и Сына и Свята́го Ду́ха, ны́не и при́сно и во ве́ки веко́в. Ами́нь.
Паки и паки, преклоньше колена, ко Пресвятей Богородице помолимся.
Пресвятая Богородице, спаси нас.
Цари́це моя́ Преблага́я, / Наде́ждо моя́, Богоро́дице, / Прия́телище си́рых / и стра́нных Предста́тельнице, / скорбя́щих Ра́досте, / оби́димых Покрови́тельнице! / Зри́ши мою́ беду́, / зри́ши мою́ скорбь; / помози́ ми, я́ко не́мощну, / окорми́ мя, я́ко стра́нна! / Оби́ду мою́ ве́си, / разреши́ ту, я́ко во́лиши: / яко не и́мам ины́я по́мощи, ра́зве Тебе́, / ни ины́я Предста́тельницы, / ни благи́я Уте́шительницы, / то́кмо Тебе́, о Богома́ти! / Я́ко да сохрани́ши мя / и покры́еши во ве́ки веко́в. Ами́нь.
Пресвята́я Богоро́дице, / спаси́ нас, спаси́ нас. /
Пресвята́я Богоро́дице, / просвети́ нас све́том Сы́на Твоего́. /
Аллилу́я. Аллилу́я. / Аллилу́я.
Премудрость, Пресвятая Богородице, спаси нас.
Честнейшую Херувим и славнейшую без сравнения Серафим, / без истления Бога Слова рождшую, сущую Богородицу Тя величаем.
Слава Тебе Христе Боже, упование наше слава Тебе.
Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.
Господи, помилуй. (3 раза)
Владыко, благослови.
Христо́с И́стинный Бог наш, моли́твами Пречи́стыя Своея́ Ма́тере, святы́х сла́вных и Всехва́ль ных Апо́стол, и́же во святы́х отца́ на́шего Никола́я архиепи́скопа, Мир Лики́йских чудотво́рца, и всех святых, помилует и спасет нас, яко Благ и Человеколюбец.
Ами́нь.
Спаси́, Христе́ Бо́же и поми́луй / Блаже́ннейшего Са́вву, / Митрополи́та Варша́вскаго и всея По́льши, / и Господи́на на́шeго Преосвяще́ннейшего Афана́сия / Епи́скопа Ло́дзинскаго и По́знаньскаго, / богохрани́мую страну́ на́шу, вла́сти и во́инства ея́ / настоя́теля и прихожа́н свята́го хра́ма сего́ / и вся правосла́вныя христиа́ны, // Го́споди, сохрани́ их на мно́гая ле́та.